Gjykata e Fierit ka vendosur të vijojë zbatimin e masës së sigurisë arrest në burg për ish-drejtorët e Kadastrës në Fier, Ertis Shehu dhe Bardhyl Kapaj, si dhe për shtetasin Pirro Çela. Ky vendim është marrë në kuadër të hetimeve për një procedim penal që lidhet me tjetërsimin e dyshuar të pronave në zonën e Semanit.
Sipas të dhënave të procesit, gjykata ka vendosur zëvendësimin e masës së sigurisë nga arrest në burg në arrest në shtëpi për juristin dhe biznesmenin Kastriot Hasko. Për këtë të fundit është urdhëruar ndalimi i largimit nga banesa dhe kontakti me persona të tjerë, përveç pjesëtarëve të familjes. Prokuroria dyshon se Hasko ka përdorur vendime të falsifikuara të Komisionit të Kthimit dhe Kompensimit të Pronave për regjistrimin e tokave në bashkëpronësi me katër persona të tjerë, të cilat më pas janë shitur te dy shoqëri tregtare.
Në vijim të hetimeve të kësaj çështjeje, autoritetet kanë sekuestruar 76 pasuri me një sipërfaqe totale prej 1,143 hektarësh, si edhe shumën prej 150 mijë eurosh. Personat nën hetim gëzojnë prezumimin e pafajësisë deri në dhënien e një vendimi të formës së prerë nga gjykata. Vendimi i Gjykatës së Fierit mund të ankimohet brenda pesë ditëve në Gjykatën e Apelit të Juridiksionit të Përgjithshëm Tiranë.