Gjykata e Lartë, me një trupë gjykuese të përbërë nga relatori Ilir Panda dhe anëtarët Genti Shala dhe Albana Boksi, ka vendosur mospranimin e rekursit të paraqitur nga mbrojtja e Belinda Ballukut. Ish-zv.kryeministrja kishte kërkuar shfuqizimin e masës së pezullimit, me argumentin se ajo nuk ushtron më funksione shtetërore dhe për rrjedhojë masa nuk prodhon më efekt juridik. Megjithatë, Gjykata e Lartë konfirmoi vendimet e mëparshme të GJKKO-së dhe të Apelit, duke lënë në fuqi masën e pezullimit si dhe ndalimin e daljes jashtë shtetit.
Belinda Balluku po hetohet nga Prokuroria e Posaçme (SPAK) për disa çështje penale, përfshirë procedurat tenderuese për Tunelin e Llogarasë, lotet e Unazës së Madhe, si dhe akuza për korrupsion, pastrim parash dhe fshehje pasurie, në lidhje me një vilë në zonën e Dhërmiut.
Sipas akteve, Balluku u mor nën hetim në tetor të vitit 2025 për shkelje të barazisë në tendera, ndërsa në shkurt të vitit 2026 ajo u shkarkua nga detyra nga Kryeministri Edi Rama. Ndërkohë, kërkesa e SPAK për arrestimin e saj nuk është miratuar nga maxhoranca parlamentare. Çështja mbetet nën shqyrtimin e organeve të drejtësisë, ndërsa masat e sigurisë të vendosura ndaj saj vijojnë të mbeten aktive.