Gjykata e Lezhës ka vendosur masën e sigurisë “Arrest në burg” për tre të arrestuarit: Elden Tarja, Kristian Ymeri (i njohur edhe si “Shkambi”) dhe Vinçesk Piroli. Të pandehurit u paraqitën këtë të hënë para trupit gjykues nën masa të rrepta sigurie, të shoqëruar nga Forcat e Ndërhyrjes së Shpejtë (FNSH).
Personat në fjalë u vunë në pranga në kuadër të operacionit policor të koduar “Detajet”, me dyshimin se po përgatiteshin për kryerjen e një atentati. Sipas të dhënave të Policisë, Kristian Ymeri dhe Vinçesk Piroli u konstatuan duke lëvizur me një motomjet të vjedhur në Suedi në aksin rrugor Pllanë–Lezhë, të armatosur dhe me skafandra. I arrestuari i tretë, Elden Tarja, dyshohet se kishte rolin e ndihmësit për largimin e tyre nga zona pas kryerjes së krimit të planifikuar.
Në cilësinë e provave materiale, Policia sekuestroi tri armë zjarri pistoleta, municion luftarak, motomjetin dhe një automjet tip “Volkswagen”. Ndaj të arrestuarve rëndojnë akuzat për veprat penale “Vrasja me paramendim”, e mbetur në tentativë dhe e kryer në bashkëpunim, “Sigurimi i kushteve dhe mjeteve materiale për të kryer vrasje” dhe “Trafikimi i mjeteve motorike”.
Grupi hetimor po verifikon dyshimet se të arrestuarit mund të jenë vrasës me pagesë, të përfshirë në ekzekutimin e Artan Myrtajt në Sarandë, si dhe në dy ngjarje të tjera kriminale në qarkun e Shkodrës dhe në Mirditë. Vinçesk Piroli dyshohet nga hetuesit si ekzekutori kryesor në këto raste. Identiteti i shënjestrës së atentatit të fundit, i cili u parandalua nga ndërhyrja e forcave të rendit në aksin Gjadër–Barbullush, mbetet ende i papublikuar.