Gjykata e Posaçme kundër Krimit të Organizuar dhe Korrupsionit (GJKKO) zhvilloi seancën e radhës në lidhje me procesin ndaj ish-kryeministrit Sali Berisha, dhëndrit të tij Jamarbër Malltezi dhe të pandehurve të tjerë. Në qendër të shqyrtimit ishin kërkesat për prova të paraqitura nga mbrojtja dhe qëndrimi i Prokurorisë së Posaçme (SPAK) ndaj tyre.
SPAK kërkoi që pretendimet e të pandehurve për papërdorshmërinë apo paligjshmërinë e provave të mos merren parasysh dhe të rrëzohen. Sa i përket kërkesës së Sali Berishës për thirrjen e kryeministrit Edi Rama si dëshmitar, organi i akuzës deklaroi se vendimi për këtë çështje i lihet në diskrecion gjykatës.
Në lidhje me të pandehurit e tjerë, SPAK theksoi se nuk ka baza për ndryshimin apo pushimin e akuzave ndaj financieres Andia Pustina dhe studios së saj. Për sa i përket kërkesave të të pandehurit Fatmir Bektashi dhe shoqërisë Kontakt, prokurorët shprehën dakordësinë për dëshmitarët e kërkuar. Për sa u përket akt-ekspertimeve kontabël, SPAK kërkoi saktësim të të dhënave, duke sqaruar se ekspertiza e paraqitur nga akuza mbetet baza për procesin, me të drejtën e të pandehurve për të kërkuar rikryerjen e saj nëse nuk pajtohen.