Gjykata e Shkodrës ka caktuar masën e sigurisë "arrest në burg" ndaj Shtjefën Ziçit, 64-vjeçari i akuzuar për vrasjen e bashkëshortes së tij me armë gjahu pranë banesës. Seanca gjyqësore u zhvillua nën drejtimin e gjyqtares Zamira Lila, ndërsa organi i akuzës u përfaqësua nga prokurorja Albulena Koliçi.
Gjatë seancës, i akuzuari nuk ka dhënë asnjë deklaratë para trupit gjykues. Avokati mbrojtës, Agim Martini, ka kërkuar kryerjen e një ekspertimi psikiatrik për klientin e tij. Mbrojtja argumentoi se Ziçi ka qenë një familjar i rregullt, kanë rritur dy fëmijë së bashku dhe çifti nuk kishte pasur konflikte të njohura, urdhra mbrojtjeje apo probleme të mëparshme. Sipas avokatit, rrethanat e ngjarjes mbeten ende të pakuptueshme dhe kërkojnë vlerësim të gjendjes mendore.
Burimet hetimore bëjnë me dije se pas arrestimit, në gjendje të rënduar psikologjike, 64-vjeçari është shprehur para efektivëve të policisë: "Kam vrarë gruan time, çfarë kam bërë?". Pas këtij momenti, ai nuk ka dhënë deklarime të tjera përpara hetuesve. Organet kompetente vijojnë veprimet hetimore për zbardhjen e plotë të rrethanave të ngjarjes.
Përditësime
Autoritetet hetimore kanë identifikuar viktimën si Bardhe Ziçi. Sipas Policisë së Shkodrës, ngjarja ka ndodhur më 9 korrik.