Gjykata e Tiranës ka caktuar masën e sigurisë "detyrim paraqitje" për shtatë të mitur të arrestuar gjatë protestës së opozitës më 10 shkurt.
Pas vendimit, Sekretari i Përgjithshëm i Partisë Demokratike, Flamur Noka, dhe avokatja Eda Grimci dolën në prononcim për mediat. Sipas Nokës, të miturit kanë deklaruar në gjykatë se janë dhunuar gjatë qëndrimit në komisariat. Ai theksoi se arrestimi dhe trajtimi i tyre nuk ndodh në vende demokratike.
Noka denoncoi se psikologu i paraqitur për të miturit ishte punonjës policie, duke e cilësuar këtë si shkelje të standardeve ligjore. Ai shtoi se të miturve u është ushtruar presion për t'i akuzuar si grup i strukturuar kriminal. Demokratët do të japin përgjigjen në protestën e 20 shkurtit.
Avokatja Grimci u shpreh se të miturit kanë dhënë deklarata pa praninë e prindërve. Arrestimet janë kryer rreth orës 20:00-21:00, por në dokumentacion pasqyrohen si në mesnatë, për të justifikuar mbajtjen në ndalim. Sipas saj, gjatë shoqërimit të miturit janë dhunuar fizikisht dhe u janë cenuar të drejtat procedurale.
Përfaqësuesit e opozitës e quajnë çështjen tejkalim të kompetencave nga policia dhe kërkojnë hetim të plotë mbi trajtimin e të miturve.
Përditësime
Flamur Noka deklaroi: «Datën 20 do ta marrë përgjigjen edhe banditi, të gjithë banditët me uniformë dhe Edi Rama si kreu i narko-shtetit».