Gjykata e Shkallës së Parë të Tiranës ka vendosur disa ditë më parë në favor të kryeministrit Edi Rama në procesin civil për shpifje kundër Brisida Shehaj.
Vendimi e konsideron shpifëse deklaratën e bërë nga Shehaj në një video-postim në Instagram më 10 mars 2022, pas ngritjes së Bordit të Transparencës për karburantet. Në atë deklaratë, Shehaj tha se kryeministri po e përdorte Bordin për të futur para në xhepat e tij. Rama e cilësoi si trillim dhe paraqiti padinë, ku kërkoi dëmshpërblim prej 1 milion lekësh. Avokatët e tij argumentuan se deklarimet kishin dëmtuar kryeministrin dhe ishin të pabaza.
Gjykata pranoi padinë pjesërisht: e njohu shpifjen, por nuk e detyroi Shehaj të paguante shumën e kërkuar. Në vend të kësaj, i kërkohet asaj të publikojë një përgënjeshtrim në rrjetet sociale.
E kontaktuar nga Top Channel, Brisida Shehaj deklaroi se do ta ankimojë vendimin, pasi nuk është i formës së prerë. Ajo kishte marrë vlerësimin "Bletën e Artë" nga Rama një vit pas ardhjes në pushtet të socialistëve, si drejtoreshë e Tatimeve. Dy vite më vonë dha dorëheqjen dhe u bë kritike e ashpër e kryeministrit në rrjetet sociale dhe studio televizive, pas bashkimit me ish-Lëvizjen Socialiste për Integrim.
Kjo nuk është hera e parë që Rama fiton gjyqe për shpifje. Ai ka triumfuar në katër procese kundër Sali Berishës, si dhe kundër Lulzim Bashës, Albana Vokshit, Arben Imamit dhe Jorida Tabakut.