Gjykata e Tiranës ka liruar nga qelia katër protestuesit e arrestuar në protestën opozitare të zhvilluar më 28 shkurt 2026 në Tiranë.
Për shtetasit Leonardo Marku, Robespier Dervishaj, Doris Rista dhe Sergei Rrapo është caktuar masa e detyrimit për paraqitje dy herë në muaj para Oficerit të Policisë Gjyqësore.
Të arrestuarit akuzoheshin për disa vepra penale, përfshirë goditjet për shkak të detyrës, prishjen e qetësisë publike, shkeljen e rregullave mbi lëndët plasëse dhe djegëse, shkatërrimin e pronës me zjarr si dhe kundërshtimin e punonjësit të rendit.
Sipas Policisë së Tiranës, gjatë protestës ata kanë hedhur molotovë dhe lëndë piroteknike në drejtim të forcave të rendit dhe të godinës së njohur si Vila 31, ku në atë moment ndodheshin shtetas të huaj, duke rrezikuar sigurinë e tyre. Si pasojë e këtyre veprimeve, u shkaktuan dëmtime në godinë dhe u dëmtuan 32 koshë mbeturinash të vendosura nga Bashkia Tiranë.
Protesta u shoqërua me përplasje mes demonstruesve dhe policisë.
Përditësime
Katër protestuesit sulmuan Vilen e Enver Hoxhës në ish-Bllok rreth orës 21:30, duke hedhur fishekzjarrë dhe molotovë që vunë në rrezik shtatë shtetas të huaj dhe shkaktuan alarm te vizitorët.