Gjykata Kushtetuese e Kosovës, më 25 mars, konstatoi se dekreti i presidentes Vjosa Osmani për shpërndarjen e Kuvendit "nuk ka efekt juridik". Vendimi i dha Kuvendit një afat prej 34 ditësh për zgjedhjen e presidentit të ri. Nëse ky proces dështon, Kuvendi shpërndahet dhe vendi shkon në zgjedhje.
Presidenti i Kosovës zgjidhet nga Kuvendi përmes tri rundeve votimi, që kërkojnë kuorum dhe shumicë të caktuar. Procesi varet kryesisht nga kompromisi politik ndërmjet partive.
Si arriti çështja në Kushtetuese?
Dekreti u nxorr më 6 mars, një ditë pasi Kuvendi nuk arriti të zgjidhë presidentin, pavarësisht nisjes së procedurës. Masa e presidentes u kontestua nga Lëvizja Vetëvendosje e kryeministrit Albin Kurti. Kushtetuesja vendosi masë të përkohshme, duke pezulluar veprimet e institucioneve deri në vendimin përfundimtar.
Vlerësimet e analistëve
Vullnet Bugaqku, nga Instituti Demokratik i Kosovës, vlerëson se Gjykata Kushtetuese përdori gjuhë të kujdesshme dhe të balancuar juridike. Ai thekson se interpretimi kushtetues u bë në kontekstin e ngërçit politik aktual. Gjykata lidh dispozitat kushtetuese me rrethanat politike në vend, çka përbën një dobësi të aktgjykimit. Megjithatë, vendimi jep mundësi shtesë institucioneve për të përmbushur detyrat kushtetuese dhe fitues janë institucionet.
Rrahman Paçarizi, profesor në Departamentin e Gazetarisë në Universitetin e Prishtinës, e konsideron vendimin neutral, por jo domosdoshmërisht profesional.