Gjykata Kushtetuese prezantoi sot Raportin Vjetor 2025, në një aktivitet me pjesëmarrjen e përfaqësuesve të institucioneve shtetërore, akademikëve, ekspertëve të së drejtës kushtetuese dhe medias.
Sipas raportit, gjatë vitit 2025 Gjykata trajtoi gjithsej 605 çështje, prej të cilave 501 kërkesa të reja dhe 104 të mbartura. Krahasuar me vitin 2024, numri i kërkesave u rrit me 17%.
Gjykata dha 429 vendime, prej të cilave 85 (rreth 20%) ishin përfundimtare dhe 344 (80%) vendime moskalimi për shqyrtim gjyqësor. Nga vendimet përfundimtare, 33 përfunduan me pranim të pjesshëm, 28 me pranim të plotë, 23 me rrëzim dhe 1 u pushua.
97% e kërkesave u paraqitën nga individë, ndërsa 3% nga subjekte të tjera, si organizata, deputetë, gjykata, Presidenti i Republikës apo parti politike. 75% e çështjeve lidhen me kundërshtimin e vendimeve të gjykatave të zakonshme, ndërsa pjesa tjetër ka të bëjë me kushtetutshmërinë e ligjeve, të drejtat themelore, konfliktet e kompetencave dhe aktet e pushtetit publik.
Mesatarja e shqyrtimit për vendimet përfundimtare ishte 8 muaj, ndërsa për moskalimet 3 muaj. Raporti thekson se asnjë çështje nuk ka qenë e tejzgjatur.
Kryetarja Fiona Papajorgji vlerësoi vitin 2025 si periudhë të rëndësishme për konsolidimin e jurisprudencës kushtetuese. Ajo tha se numri në rritje i kërkesave shpreh rritjen e besimit të publikut në garancitë e drejtësisë kushtetuese dhe afirmimin e rolit të Gjykatës në mbrojtjen e të drejtave themelore të njeriut.
Përditësime
Gjykata Kushtetuese nxorri në 2025 vendime kyçe që ndikojnë në jurisprudencën kushtetuese. Ato trajtojnë:
- Lirinë e shprehjes;
- Mbrojtjen e jetës private dhe të dhënave personale;
- Paprekshmërinë e banesës dhe ambienteve profesionale;
- E drejten e pronës;
- Standardet e procesit të rregullt ligjor.
Sipas Raportit Vjetor 2025, të prezantuar sot.