Paneli i gjyqtarëve të Gjykatës Speciale ka marrë vendim për të vazhduar paraburgimin e ish-presidentit të Kosovës, Hashim Thaçi.
Vendimi është publikuar më 13 prill 2026. Në të, paneli konstaton se argumenti i parë i Prokurorisë Speciale në kërkesën për vazhdim paraburgimi nuk mbështetet plotësisht. Bëhet fjalë për rrezikun e arratisjes.
Gjykata vlerëson se, ndonëse rreziku i arratisjes nuk përjashtohet plotësisht, Prokuroria Speciale nuk ka arritur të vërtetojë një mundësi reale dhe të besueshme që Hashim Thaçi të arratiset nëse lirohet. "Paneli konstaton se, ndërsa rreziku i arratisjes nuk mund të përjashtohet kurrë plotësisht, Paneli konsideron se Prokuroria Speciale nuk ka arritur të vërtetojë pretendimin e saj për një "mundësi mjaftueshëm reale" që i akuzuari të arratiset nëse lirohet bazuar në fazën e procedurave", thuhet në dokument.
Megjithatë, paraburgimi i Hashim Thaçit vazhdohet për shkak të rrezikut të pengimit të përparimit të procedurave të Gjykatës Speciale dhe kryerjes së veprave të tjera kriminale.