Gjykata Themelore e Prishtinës ka shpallur sot aktgjykimin ndaj tre të akuzuarve për sulmin terrorist në Banjskë më 24 shtator 2023, ku u vra rreshteri policor Afrim Bunjaku dhe u lënduan dy policë të tjerë.
Bllagoje Spasojeviq dhe Vlladimir Toliq u dënuan me burgim të përjetshëm, ndërsa Dushan Maksimoviq me 30 vite burgim.
Ministri i Punëve të Brendshme, Xhelal Sveçla, reagoi në Facebook, duke e vlerësuar vendimin si moment të rëndësishëm për drejtësinë e Republikës së Kosovës. Ai shkroi se dënimet maksimale duhet të zbatohen ndaj të gjithë të përfshirëve, përfshirë pjesëtarët e një rrjeti më të gjerë prej 45 personash të identifikuar.
Sipas Sveçlës, sulmi nuk ishte akt i izoluar, por operacion i organizuar me mbështetje shtetërore nga Serbia, me synim cenimin e rendit kushtetues dhe aneksimin e një pjese të territorit. Ai tha se Kosova ka çmontuar strukturat kriminale dhe paramilitare në veri, ka mbrojtur rendin kushtetues dhe tani Serbia duhet të mbahet përgjegjëse për rolin e saj politik, financiar e logjistik.
Ministri e cilësoi vendimin mesazh të qartë se kush cenon Republikën e Kosovës dhe Policinë e saj do të përballet me drejtësinë. Drejtësia për Banjskën, sipas tij, nuk përfundon këtu, por përmbyllet kur të gjithë përgjegjësit, me në krye Milan Radoiçiqin, të dalin para drejtësisë. Dënimi nuk e kthen Afrim Bunjakun, por është hap drejt drejtësisë për sakrificën e tij.
Përditësime
Gjykatësi Ngadhnjim Arrni deklaroi se qëllimi i grupit ishte destabilizimi i Kosovës dhe shkëputja e veriut për ta bashkuar me Serbinë.
Avokatët e të dënuarve e cilësuan vendimin si të ashpër dhe shkelje të së drejtës penale, duke paralajmëruar ankesë.
Ushtruesja e detyrës së kryeprokurores Albulena Haxhiu vlerësoi vendimin si dëshmi se sulmet nuk mbeten pa ndëshkim dhe se drejtësia do të përmbyllet me Radoiçiqin.
Detaje të reja tregojnë se grupi bllokoi urën dhe sulmoi policët që shkuan ta heqin kamionin; Radoiçiq udhëhiqte grupin dhe është në arrati me shumicën e të akuzuarve.