Gjykata Themelore e Prishtinës pranoi marrëveshjen për pranim fajësie ndaj Sllobodan Radenkoviq, të akuzuar për sulm ndaj pjesëtarëve të KFOR-it dhe Policisë së Kosovës në Zveçan më 29 maj 2023. Seanca dëgjimore u mbajt më 29 prill 2026, ku trupi gjykues, i kryesuar nga gjyqtarja Medie Bytyqi, miratoi marrëveshjen e arritur mes të akuzuarit dhe Prokurorisë Speciale të Kosovës.
Sipas marrëveshjes, Radenkoviq u dënua me dy vjet burgim efektiv për veprën penale "Sulm ndaj personit zyrtar", duke llogaritur edhe kohën e paraburgimit. Për veprën "Pjesëmarrja në turmë që kryen vepër penale dhe huliganizmi" u parashikua 6 muaj burgim ose gjobë në vlerë 15 mijë euro. Shpallja e aktgjykimit u bë në orën 10:30 të së njëjtës ditë.
I akuzuari Sllobodan Radenkoviq, i pyetur nga kryetarja e trupit gjykues, mohoi se ishte kërcënuar apo joshur për të pranuar fajin. Prokurori special Bekim Kodraliu deklaroi se marrëveshja u arrit pa presion, me vullnet të lirë dhe në konsultim me mbrojtësin e të akuzuarit, në përputhje me Kodin e Procedurës Penale.
Ngjarja ndodhi në perimetrin e objektit të Komunës së Zveçanit, ku Radenkoviq, në bashkëkryerje me persona të tjerë, dyshohet se ka marrë pjesë aktive në ushtrimin e dhunës ndaj forcave të KFOR-it dhe Policisë së Kosovës, nga ora 06:00 e mëngjesit deri në mbrëmje.
Prokuroria Speciale e Republikës së Kosovës mirëpriti aktgjykimin, duke e cilësuar si zhvillim të rëndësishëm për vendosjen e drejtësisë dhe forcimin e sundimit të ligjit. Sipas njoftimit zyrtar, vendimi adreson veprimet që cenojnë rendin dhe sigurinë publike, si dhe dëshmon efikasitetin e sistemit të drejtësisë në trajtimin e shpejtë të rasteve penale.
Përditësime
Gjykata Themelore e Prishtinës zëvendësoi me gjobë prej 15 mijë eurosh dënimin me 6 muaj burg ndaj Sllobodan Radenkoviq, me kërkesë të të dënuarit.