Dhomat e Specializuara për Kosovën kanë mbyllur procedurën e paraqitjes së provave në gjykimin ndaj ish-krerëve të Ushtrisë Çlirimtare të Kosovës (UÇK). Ky proces gjyqësor, i cili trajton akuzat për krime lufte dhe krime kundër njerëzimit, përfshin Hashim Thaçin, Kadri Veselin, Jakup Krasniqin dhe Rexhep Selimin.
Deklaratat përmbyllëse nga palët janë caktuar të mbahen nga data 9 deri më 13 shkurt 2026, me data rezervë më 16 dhe 18 shkurt. Prokurori i Specializuar do të ketë 8 orë për fjalën e tij përfundimtare, Zyra për Mbrojtjen e Viktimave 3 orë, ndërsa secili ekip mbrojtës i të akuzuarve nga 4 orë e gjysmë.
Pas këtyre deklaratave, Trupi Gjykues do të shpallë gjykimin të mbyllur dhe do të nisë kuvendimet për aktgjykimin. Sipas rregullave, aktgjykimi duhet të shpallet brenda 90 ditësh nga mbyllja e gjykimit, me mundësi zgjatjeje deri në 60 ditë të tjera nëse rrethanat e kërkojnë. Deri tani, nuk është caktuar data e saktë për shpalljen e vendimit.
Monitoruesit e këtij procesi presin që vendimi përfundimtar të jetë meritor dhe i bazuar plotësisht në provat e paraqitura. Ata theksojnë se deklaratat përmbyllëse do të ofrojnë një analizë të detajuar të provave dhe zhvillimeve gjatë shqyrtimit, duke ndihmuar trupin gjykues në vlerësimin përfundimtar.