Agjencia për Mjedisin në Angli ka shpallur zyrtarisht gjendje thatësire në gjysmën e territorit të vendit, si pasojë e reshjeve rekord të ulëta dhe temperaturave të larta të zgjatura. Kjo gjendje përfshin shtatë rajone kryesore: East Anglia, Hertfordshire dhe gjithë Londrën, Luginën e Temzës, Hampshire dhe Ishullin Wight, Devon dhe Cornwall, West Midlands, si dhe rajonin Wessex, i cili përfshin Dorset, Somerset, Wiltshire dhe South Gloucestershire.
Sipas parashikimeve, vendi po përballet me valën e katërt të të nxehtit për këtë vit, ku temperaturat pritet të arrijnë kulmin të mërkurën deri në 35 gradë Celsius. Në këtë kontekst, Agjencia Britanike e Sigurisë Shëndetësore (UKHSA) ka lëshuar një alarm portokalli për rrezikun nga nxehtësia, i cili do të mbetet në fuqi deri të enjten për rajonet East Midlands, East of England, South East dhe Londër. Agjencia ka paralajmëruar se këto kushte klimatike shtojnë rreziqet për shëndetin e qytetarëve, veçanërisht për grupet më të cenueshme.
Ekspertët theksojnë se këto fenomene ekstreme të motit janë nxitur nga ndryshimet klimatike si pasojë e aktivitetit njerëzor, kryesisht nga djegia e lëndëve fosile. Shërbimi Meteorologjik Britanik (Met Office) ka paralajmëruar se zjarret mund të bëhen jashtëzakonisht të rënda nëse shpërthejnë në pjesë të Londrës, në rajonet juglindore dhe lindore të Anglisë.
Këshilli Kombëtar i Shefave të Zjarrfikësve (NFCC) ka bërë të ditur se, gjatë vitit 2026, shërbimet emergjente në Angli dhe Uells kanë ndërhyrë në 706 zjarre në natyrë. Vetëm gjatë periudhës 16 deri më 28 korrik janë regjistruar 208 incidente, shifër që tregon për shtimin e shpejtë të aktiviteteve të zjarreve gjatë periudhave të thata.
Përditësime
Autoritetet shpallën zjarrin në Dunwich Heath si incident të madh, ndërsa flakët po përhapen në afërsi të termocentralit bërthamor Sizewell B, vetëm katër kilometra larg. Ekipe të emergjencës urdhëruan evakuimin e rreth 200 karvaneve nga Parku i Pushimeve Cliff House në Suffolk. Në një zhvillim paralel, një zjarr në Romford shkatërroi 30 hektarë kullota, ndërsa 100 zjarrfikës po luftojnë me flakët në Raynham për të parandaluar përshkallëzimin e situatës.