Toni Gogu, ministër i Drejtësisë, zhvilloi të enjten në Bruksel një takim me Annelies Verlinden, ministre belge e Drejtësisë. Në bisedë u diskutua ecuria e Shqipërisë në procesin e integrimit në Bashkimin Europian, rezultatet e reformës në drejtësi dhe bashkëpunimi dypalësh në luftën kundër krimit të organizuar.
Gjatë takimit, Gogu theksoi se Shqipëria pret një vlerësim të ndershëm dhe të argumentuar nga institucionet europiane, të bazuar në fakte dhe rezultate konkrete, jo në interpretime politike. Ai nënvizoi se reforma në drejtësi ka dhënë arritje të prekshme, të papara në ndonjë vend tjetër në fazën e para-anëtarësimit. Ministri deklaroi se Shqipëria nuk ka ‘plan B’, por vetëm rrugën e integrimit europian, të fituar mbi meritë, përmes forcimit të shtetit të së drejtës dhe zbatimit të reformave.
Palët diskutuan gjithashtu për thellimin e bashkëpunimit midis Shqipërisë dhe Belgjikës kundër krimit të organizuar, me fokus te konfiskimi i aseteve të paligjshme. Ato vlerësuan rëndësinë e goditjes së fuqisë financiare të grupeve kriminale dhe nevojën për koordinim më të ngushtë institucional e operacional.
Verlinden shprehu vlerësim për arritjet e Shqipërisë dhe punën e institucioneve shqiptare në fushën e drejtësisë dhe sundimit të ligjit, duke siguruar mbështetje të vazhdueshme për integrimin në BE. Në përfundim, Gogu vlerësoi partneritetin me Belgjikën dhe konfirmoi se Shqipëria do të vazhdojë punën për të forcuar shtetin e së drejtës dhe për të avancuar drejt Bashkimit Europian me rezultate të matshme.