Granit Rugova, ish-basketbollist i KB Prishtina, ka shpallur kandidaturën e tij për kryetar të këtij klubi të dielën. Kjo vjen pak minuta pas raportimeve se Bekë Berisha ka dhënë dorëheqje nga pozita e kryetarit, të cilën e kishte marrë vetëm javën e kaluar.
Rugova e shprehu vendimin në një postim në Facebook, ku theksoi se nuk vepron nga ambicie personale, por nga një obligim moral. Ai deklaroi se posedon njohuritë, përvojën dhe energjinë e nevojshme për ta menaxhuar klubin, në bashkëpunim me Plisat, qytetarët e Prishtinës dhe dashamirët e tjerë.
Përvoja e Rugovës
Rugova kujtoi lidhjen e tij të ngushtë me Prishtinën që nga periudha pas luftës. Në këtë klub u rrit si basketbollist, sportist dhe njeri, duke përjetuar fitore, sfida dhe momente historike që i mësuan përgjegjësinë ndaj fanellës dhe qytetit.
Pas përfundimit të karrierës si lojtar, ai vazhdoi kontributin në Federatën e Basketbollit të Kosovës dhe më pas shërbeu si Drejtor i Sportit në Komunën e Prishtinës. Kjo përvojë, sipas tij, i jep pamje të qartë mbi udhëheqjen e një klubi të madh me vizion, stabilitet dhe transparencë.
Synimet për klubin
Rugova e cilësoi Prishtinën si identitet të kryeqytetit dhe krenari qytetare. Ai bëri thirrje për bashkim, punë të ndershme dhe vizion të qartë, me qëllim rikthimin në rrugën e fitoreve dhe kupave. "Bashkë mundemi dhe do t’ia dalim", shkroi ai midis të tjerash.