Autoritetet greke po hetojnë një dron detar ushtarak të tipit MAGURA V5, të mbushur me rreth 100 kilogramë eksploziv, të gjetur pranë ishullit Lefkadë në Detin Jon. Mjeti u zbulua nga peshkatarë, midis të cilëve dy bullgarë në zonën e Dukatos, dhe u tërhoq në portin e Vasilikit.
Sipas reportazhit investigativ të televizionit grek STAR, hetimet përqendrohen në dy porte si pika të mundshme nisjeje: portin e Vlorës në Shqipëri dhe portin e Misratës në Libinë Perëndimore. Të dyja zonat konsiderohen me rëndësi strategjike në Mesdhe, ndërsa në Libi përmendet prania e ekspertëve ukrainas të droneve dhe personelit ushtarak. Autoritetet po analizojnë rrugën e ndjekur nga droni dhe mënyrën se si përfundoi në Detin Jon.
Objektivi i dyshuar
Pamjet satelitore tregojnë lëvizjen e një autokolone anijesh ruse në jug të Kretës dhe Maltës, drejt portit të Tartusit në Siri. Ekspertë ndërkombëtarë dhe specialistë të sistemeve pa pilot, si Vaggelis Xanthakis, vlerësojnë se droni mund të ketë qenë projektuar për të goditur këto anije në ujërat ndërkombëtare. Ata e përshkruajnë si një "torpedo të telekomanduar sipërfaqësore", të aftë për dëme të mëdha ndaj anijesh të mëdha.
Droni dyshohet se ka humbur kontrollin ose ka pësuar defekt gjatë misionit. Autoritetet greke po verifikojnë edhe rolin e peshkatarëve bullgarë dhe praninë e tyre në zonë.
Reagimi zyrtar grek
Ministri i Jashtëm grek Giorgos Gerapetritis e cilësoi incidentin jashtëzakonisht serioz. Ai deklaroi se Shtabi i Përgjithshëm i Forcave të Armatosura po kryen analizën teknike të të dhënave dhe se qeveria do të ndërmarrë hapa diplomatikë e institucionalë të nevojshëm. Gerapetritis theksoi se Greqia nuk do të lejojë kthimin e Mesdheut në teatër operacionalesh ushtarake dhe do të garantojë sigurinë e lundrimit, qytetarëve dhe mjedisit.
Përditësime
- Hetimet në Libi zbuluan praninë e mbi 200 oficerësh dhe specialistësh të dronëve ukrainas.
- Autokolona ruse përbëhet nga tre anije çisternë.
Nikos Dendias, ministri grek i Mbrojtjes, konfirmoi zyrtarisht për herë të parë se droni i gjetur pranë Lefkadës është ukrainas. Konfirmimi erdhi në Këshillin e Ministrave të Mbrojtjes së BE-së në Bruksel, në prani të ministrrit ukrainas të Mbrojtjes via videokonferencë.
- Ministri ukrainas i Mbrojtjes nuk dha përgjigje të menjëhershme, por u rezervua të hetojë dhe sqarojë më vonë.
- Opozita greke kërkon sqarime të plota në Parlament për mungesën e zbulimit të hershëm dhe rrezikun e transferimit të konfliktit pranë brigjeve greke.