Greqia po përballet me një valë të fuqishme zjarresh që kanë përfshirë disa rajone të vendit. Fronti më i rrezikshëm mbetet ai në Porto Germeno, në Atikën Perëndimore, ku flakët kanë arritur në malin Kithaironas dhe po lëvizin drejt zonës së Venizës. Autoritetet kanë aktivizuar mesazhin emergjent 112, duke urdhëruar banorët e Alepochori, Psatha, Veniza, Loumpa dhe Zachouli të zhvendosen drejt Megarës.
Zëdhënësi i Shërbimit Zjarrfikës grek, Janis Artopios, njoftoi se erërat e forta kanë penguar ndjeshëm ndërhyrjen e rreth 30 mjeteve ajrore të angazhuara gjatë ditës. Në terren, operacioni po kryhet nga më shumë se 450 zjarrfikës dhe 126 mjete tokësore, me mbështetjen e ekipeve të ardhura nga Franca dhe Rumania. Nënkryetari i bashkisë Mandra-Eidyllias, Dimitris Pagonis, konfirmoi se mbi 100 banesa janë shkatërruar ose dëmtuar. Gjithashtu, banorët e Agia Paraskevi, Mytikas, Kryo Pigadi dhe Agios Nektarios janë evakuuar për arsye sigurie.
Sipas Mbrojtjes Civile greke, gjatë 24 orëve të fundit janë regjistruar 59 zjarre në të gjithë vendin, nga të cilat 45 janë vënë nën kontroll. Vatra të tjera aktive raportohen në:
- Fokidë (Skaloma, Klima, Pigi, Koukoura, Nea Koukoura, Magoula, Pefkaki, Efpalio)
- Beoti (Domvrena, Agios Nikolaos)
- Aigialeia
Në zonën e Beotisë, dy zjarrfikës janë dërguar për trajtim mjekësor, ku njëri prej tyre ka pësuar probleme kardiake. Ndërkohë, në Rethymno të Kretës dhe në Aigialeia, situata raportohet në përmirësim falë rënies së intensitetit të erërave.
Përditësime
Situata e zjarreve në Greqi është përkeqësuar për shkak të erërave të forta, me shpejtësi deri në 130 km/h. Zjarret kërcënojnë qytetin e Megarës, ndërsa vatra të reja janë regjistruar në Kefaloni. Dëmet mjedisore përfshijnë 10.000 hektarë pyje në perëndim të Athinës dhe 5.000 hektarë në Kretë. Raportimet jozyrtare tregojnë se numri i banesave të shkatërruara ka shkuar në 200, duke dyfishuar bilancin e mëparshëm.
Mbrojtja Civile ka shtuar ndërhyrjen në terren, duke angazhuar 496 zjarrfikës dhe 134 automjete në zonat e prekura. Në Megarë, flakët po kërcënojnë zonat e banuara, ku është konfirmuar dëmtimi i disa banesave. Për të garantuar sigurinë e qytetarëve, autoritetet kanë nisur evakuimin e turistëve nga zonat e rrezikuara.