Një ngjarje e rëndë është regjistruar në kryeqytetin e Kosovës, ku një grua është gjetur pa shenja jete në banesën e saj. Rasti ka ndodhur në rrugën “Nazim Gafurri” në Prishtinë, ndërsa zbulimi është bërë nga familjarët e viktimës, të cilët kanë njoftuar menjëherë autoritetet.
Në vendin e ngjarjes kanë mbërritur njësitë përkatëse të Policisë së Kosovës dhe ekipi mjekësor, i cili ka konstatuar vdekjen e shtetases kosovare. Me urdhër të prokurorit, trupi i pajetë është dërguar në Institutin e Mjekësisë Ligjore (IML) për t'iu nënshtruar procedurës së obduksionit.
Sipas raportit zyrtar të policisë, rasti është iniciuar si “Hetim mbi vdekjen” dhe autoritetet po punojnë për zbardhjen e plotë të rrethanave të ngjarjes.