Në përvjetorin e 18-të të shpalljes së pavarësisë së Kosovës, më 17 shkurt, në sheshin Skënderbeu në Prishtinë do të zhvillohet një protestë mbarëpopullore në mbështetje të ish-krerëve të UÇK-së që po gjykohen në Hagë.
Hysni Gucati, kryetar i OVL-UÇK, ka folur për këtë organizim në një bisedë për Euronews Albania. Ai ka thënë se pret pjesëmarrjen e presidentëve të dy shteteve shqiptare, Bajram Begaj të Shqipërisë dhe Vjosa Osmani të Kosovës.
"Deri më tani, nuk është zyrtare, por në bazë të informacioneve, presim presidentin e Shqipërisë, Bajram Begaj, bashkë me presidenten Vjosa Osmanin t’i bashkëngjiten protestës në Prishtinë. Taulant Balla do të jetë pjesë e protestës, sikurse edhe shumë deputetë nga të gjitha partitë politike në Shqipëri. Po ashtu, edhe studentë nga universitetet e Shqipërisë, të cilët do të vijnë në mënyrë të organizuar", ka deklaruar Gucati.
Protesta synon të mbledhë mbështetje të gjerë për figurat e ish-UÇK-së të akuzuara në Gjykatën e Hagës.
Përditësime
Platforma qytetare 'Liria ka Emër' mbajti konferencë shtypi me Eliza Hoxha dhe Ismail Tasholli para marshit 'Drejtësi, jo politikë' të 17 shkurtit në Prishtinë.
Mobilizim nga të gjitha komunat e Kosovës, me konfirmime dhe organizim transporti.
Mbështetje nga sindikata, profesionistë të lirë, mësimdhënës, mjekë, artistë, sportistë dhe bashkësi fetare.
Eliza Hoxha theksoi unitetin qytetar dhe sheshin Skënderbeu si 'zemra e Kosovës'.