Etapa e tretë e Rrethit të 83-të Çiklistik të Shqipërisë përfundoi të mërkurën me itinerarin Elbasan-Vlorë.
Guillaume Haldimann i ekipit zviceran Humard VP arriti fitore në vijën e finishit pas një gare të fortë mes pesë çiklistëve kryesorë. Ai regjistroi kohën 3:04:55 dhe me këtë rezultat mori udhëheqjen e përgjithshme me 10:03:58.
Në vendin e dytë u rendit holandezi Niels Reemeijer i ekipit Wielerploeg Groot Amsterdam, ndërsa vendin e tretë e zuri rumuni Cristian Raileanu. Çiklisti shqiptar Gabriele De Fabritiis përfundoi në vendin e 17-të.
Fanella e sprinteve mbahet nga turku Tahir Bugra Yigit, fanella e malit nga slloveni Timotej Bavec dhe fanella e bardhë e klasifikimit U-23 nga sllovaku Likas Panacek.
Klasifikimi ekipor kryesohet nga ekipi holandez Wielerploeg Groot Amsterdam. Etapa e katërt do të zhvillohet të enjten me itinerarin Vlorë-Llogara-Himarë-Kuç-Vlorë, ndërsa etapa e fundit është planifikuar për të premten.