Gent Sejko, guvernator i Bankës së Shqipërisë, priti të mërkurën në Tiranë Xiaoqing Yu, drejtoreshë e Bankës Botërore për Ballkanin Perëndimor, dhe Martha Licetti, menaxhere për rajonin e Ballkanit pranë kësaj banke.
Takimi u zhvillua në kuadër të bashkëpunimit të vazhdueshëm ndërmjet Bankës së Shqipërisë dhe Bankës Botërore për forcimin e stabilitetit financiar dhe zhvillimin e sektorit financiar në Shqipëri. Sejko vlerësoi mbështetjen e vazhdueshme të Bankës Botërore, veçanërisht nëpërmjet asistencës teknike dhe projekteve që synojnë përmirësimin e kuadrit rregullator, forcimin e stabilitetit financiar dhe zhvillimin e tregjeve financiare.
Gjatë bisedës, guvernatori prezantoi panoramën e zhvillimeve ekonomike në vend, duke theksuar se ekonomia shqiptare dhe treguesit kryesorë të stabilitetit ekonomik, monetar e financiar ndodhen në trajektore pozitive zhvillimi. Ai nënvizoi se, ndonëse pasiguria në mjedisin ekonomik global mbetet e lartë, vendimet e politikës monetare do të mbështeten në analizën e të dhënave më të fundit ekonomike dhe financiare. Këto vendime synojnë ruajtjen e stabilitetit të çmimeve, duke qenë në përputhje me politikën fiskale dhe zhvillimet në kursin e këmbimit.
Palët diskutuan prioritetet kryesore të reformave në sektorin financiar dhe projektet zhvilluese në kuadër të serisë së ardhshme të Development Policy Lending (DPL) 2026–2027. Një temë tjetër e rëndësishme ishte Programi i Vlerësimit të Sektorit Financiar (FSAP), ku ndanë pikëpamjet mbi pritshmëritë dhe prioritetet për forcimin e qëndrueshmërisë së këtij sektori.
Bisedimet u përqendruan gjithashtu në progresin e arritur drejt stabilitetit financiar, forcimit të kuadrit të mbikëqyrjes, përafrimit rregullator me standardet e Bashkimit Evropian, përfshirë programin FINSAC. U trajtuan zhvillimet në modernizimin dhe digjitalizimin e sistemeve të pagesave, ndikimin e anëtarësimit në SEPA dhe ndërtimin e sistemit të pagesave të menjëhershme, si dhe mundësitë për mbështetje teknike nga Banka Botërore. Palët ranë dakord për të vazhduar bashkëpunimin në reformat për forcimin e sektorit financiar.