Sulmuesi i Manchester Cityt, Erling Haaland, ka theksuar se kombëtarja e Anglisë mban barrën e presionit në prag të çerekfinales së Kupës së Botës 2026. Sipas Haaland, skuadra e drejtuar nga Thomas Tuchel është një nga favoritët kryesorë për fitimin e trofeut.
"Mendoj se ka disa favoritë të qartë dhe Anglia është një prej tyre. Të gjithë ju duhet të vendosni çdo presion mbi djemtë anglezë", deklaroi Haaland në konferencën për shtyp. Për 25-vjeçarin, kjo përballje ka një domethënie personale, pasi ka lindur në Angli dhe aktivizohet në kampionatin anglez.
Norvegjia, e cila nuk kishte marrë pjesë në një kampionat botëror që nga viti 1998, po shijon një rrugëtim historik. Haaland pranoi se arritja deri në çerekfinale ka qenë befasuese edhe për vetë lojtarët, sidomos pas eliminimit të Brazilit në fazën e 1/8-ave.
"Të mposhtësh Brazilin dhe më pas të luash ndaj Anglisë në çerekfinale është diçka shumë e veçantë. Shikoni skenat në Norvegji dhe do ta kuptoni se kjo nuk është aspak normale për ne", u shpreh ylli norvegjez. Deri më tani, Haaland ka qenë protagonist absolut i turneut me 7 gola të shënuar në 4 paraqitje.
Përtej performancës në fushë, sulmuesi ka tërhequr vëmendje të madhe edhe për popullaritetin në rritje tek publiku amerikan, ku po zhvillohet turneu, duke u shndërruar në një ndër figurat më të komentuara të këtij Botërori.