Kryetari i Partisë Demokratike të Kosovës (PDK), Bedri Hamza, ka zhvilluar një takim me deputetët e zgjedhur të partisë, ku është diskutuar për situatën politike dhe domosdoshmërinë për formimin e shpejtë të institucioneve të reja.
Në një njoftim për media, PDK thekson se procesi i konstituimit të Kuvendit duhet të përmbyllet pa vonesa. Sipas partisë, vazhdimi i bllokadës nga ana e pushtetit, pas një periudhe të gjatë pasigurie, thellon krizën dhe cenon interesin e qytetarëve.
"Kosova ka nevojë urgjente për stabilitet politik, institucione funksionale dhe vendimmarrje që u përgjigjet pritjeve të qytetarëve, jo për zvarritje të proceseve që dëmtojnë interesin publik dhe të ardhmen e vendit", thuhet në komunikatën e partisë.
Deputetët e PDK-së ritheksuan nevojën për institucione të afta që fokusohen në prioritetet kyçe, siç janë zhvillimi ekonomik, mirëqenia sociale, forcimi i shtetit dhe përmirësimi i cilësisë së jetës. Po ashtu, ata i bënë thirrje subjektit që ka dalë i pari në zgjedhje të marrë përgjegjësinë kushtetuese dhe politike për zhbllokimin e procesit.