Ish-deputeti i Aleancës për Ardhmërinë e Kosovës, Daut Haradinaj, ka reaguar pas miratimit të deklaratës së Kuvendit të Kosovës në lidhje me vendimin e Dhomave të Specializuara ndaj ish-drejtuesve të UÇK-së. Haradinaj e ka vlerësuar këtë deklaratë si të stërvonuar, duke u shprehur se ajo merr kuptim të plotë vetëm nëse brenda kësaj jave në Kuvend votohet ligji për zhbërjen e Gjykatës Speciale.
Sipas Haradinajt, çdo veprim tjetër, përfshirë takimet e zhvilluara së fundmi mes kryeministrit Albin Kurti, kryetarit të Partisë Demokratike të Kosovës (PDK), Bedri Hamza, dhe kryetarit të Lidhjes Demokratike të Kosovës (LDK), Lumir Abdixhiku, përbëjnë thjesht kalkulime politike. Ai i ka cilësuar këto takime si "të errëta".
Në deklaratën e tij, Haradinaj ka kundërshtuar gjithashtu logjikën e debatit mbi lartësinë e dënimeve, duke argumentuar se kualifikimet si "dënim i rëndë" apo "dënim i lehtë" nuk përkojnë me kërkesat e qytetarëve shqiptarë. Ai u shpreh se populli është ngritur në sheshet e botës me thirrjen e përbashkët: "Jo në emrin tim".