Ambasadori i Mbretërisë së Bashkuar në Kosovë, Jonathan Hargreaves, ka vizituar kufirin në Han të Elezit, vendi ku trupat britanike hynë në Kosovë në qershor të vitit 1999 si pjesë e misionit të NATO-s, të autorizuar nga Rezoluta 1244 e Këshillit të Sigurimit të OKB-së. Në një deklaratë të publikuar, ambasadori rikujtoi se politikat e Slobodan Millosheviqit shkaktuan krime lufte dhe represion, duke detyruar qindra mijëra shqiptarë të largohen nga shtëpitë e tyre.
Duke iu referuar zhvillimeve në Dhomat e Specializuara të Kosovës, ambasadori Hargreaves vlerësoi vendimin e Kosovës për krijimin dhe mbështetjen e këtij institucioni, pavarësisht faktit se hetimet kanë përfshirë figura qendrore të luftës çlirimtare. Sipas tij, ky veprim dëshmon angazhimin e shtetit ndaj parimit se askush nuk është mbi ligjin, duke e cilësuar këtë si një shembull për rajonin.
Ambasadori britanik nënvizoi se dënimet e shpallura nga gjykata e Hagës kanë karakter individual dhe nuk përbëjnë gjykim mbi shtetësinë, sovranitetin ose të drejtën e Kosovës për të përcaktuar të ardhmen e saj. Ai siguroi se Mbretëria e Bashkuar do të vazhdojë ta mbrojë me forcë këtë të drejtë, duke kujtuar se të dënuarit gëzojnë të drejtën e apelimit. Në përmbyllje të mesazhit, Hargreaves ripohoi se Britania e Madhe mbetet e angazhuar për të vërtetën dhe pajtimin afatgjatë në Ballkanin Perëndimor, duke premtuar bashkëpunim të vazhdueshëm me partnerët ndërkombëtarë për paqen dhe zhvillimin e të gjitha komuniteteve.