Ish-presidenti i Kosovës, Hashim Thaçi, ka dhënë një intervistë nga burgu i Hagës për emisionin Opinion, të moderuar nga Blendi Fevziut, më 4 maj 2026.
Ai u shpreh se qëndrimi në burg nuk e bën të mallkojë askënd dhe se borxh nuk i ka askujt. “Fakti që jam këtu nuk më bën të mallkoj askënd e as nuk i lutem askujt. Borxh nuk i kam askujt në këtë botë. Vetmia nuk më ka ngrysur apo mbyllur brenda lëkurës sime. Jam arratisur – e thyej vetminë me lexim dhe shkrim. Nuk jam i zemëruar me askënd. Përkundrazi. Në ndërgjegje çdo çast në qeli e kam qëndresën dhe shpresën. Padrejtësisë po i përgjigjem me ndërgjegje të revoltuar, por me optimizëm. Besimi në drejtësi më ndihmon më së shumti. Por, edhe pse po kaloj vitin e gjashtë në izolim, kam vendosur ndoshta të mbetem 'naivi' i fundit në vendin tim. Të besoj në vlera, humanizëm dhe drejtësi”, tha Thaçi.
Ish-presidenti theksoi se procesi gjyqësor ka devijuar dhe se duhet të ofrojë drejtësi, jo hakmarrje. Ai kërkoi që gjykimi të jetë transparent, llogaridhënës dhe të respektojë të drejtat e njeriut.
Thaçi u shpreh se në burg “më është mbyllur goja për të folur dhe më janë lidhur duart për të shkruar atë që ma do zemra e thotë plotësisht mendja”. Ai po kalon vitin e gjashtë në izolim pa vendim gjyqësor.