Hawaii po përballet me përmbytjet më të rënda në 20 vitet e fundit. Autoritetet u kanë dhënë urdhra evakuimi mijëra banorëve, ndërsa shirat e rrëmbyeshëm vazhduan të bien në orët e para të mëngjesit të së shtunës, më 21 mars 2026.
Kjo është stuhia e dytë e fortë që godet arkipelagun brenda javës së fundit. Dëmet e pritshme tejkalojnë 1 miliard dollarë, sipas autoriteteve. Më shumë se 230 persona janë shpëtuar deri tani.
Autoritetet paralajmëruan se një digë në Oahu, ishullin më të populluar, ndodhet në rrezik shembjeje. Kryebashkiaku i Honolulu, Rick Blangiardi, u bëri thirrje banorëve të "qëndrojnë të sigurt" dhe ta marrin stuhinë seriozisht. Urdhrat e evakuimit u dhanë për rreth 5.500 persona në veri të Honolulu, ndërsa rrugë të shumta u mbyllën nëpër ishuj.
Guvernatori Josh Green, në konferencën për shtyp të së premtes, konfirmoi mungesën e viktimave dhe vlerësoi punonjësit e emergjencës. Ai theksoi se stuhia ka pasur "pasoja serioze" për shtetin, me dëme të mëdha në aeroporte, shkolla, rrugë, spitale dhe shtëpi. "Kjo është përmbytja më e madhe në Hawaii në 20 vjet", tha Green.
Departamenti i Menaxhimit të Emergjencave në Honolulu lëshoi paralajmërime për përmbytje të menjëhershme dhe këshilloi zhvendosjen në zona më të larta. Paralajmërime u dhanë gjithashtu për Maui, Molokai dhe Ishullin e Madh. Ishujt ndodhen nën ndikimin e një "Kona Low", një zone presioni të ulët që lëviz ngadalë.