Haxhi Avdyli, deputeti i vetëm i Partisë Guxo që u rreshtua hapur në krah të presidentes Vjosa Osmani, ka hedhur poshtë mundësinë e rikthimit në Lidhjen Demokratike të Kosovës.
Në një deklaratë për Kanal 10, Avdyli tha se nuk ka asnjë plan për t’u rikthyer në LDK dhe se do të vazhdojë të jetë pjesë e grupit parlamentar të Lëvizjes Vetëvendosje, pavarësisht dorëheqjes nga të gjitha pozitat në Partinë Guxo.
Deklarata e tij u bë pak orë pasi kryetari i LDK-së, Lumir Abdixhiku, në një postim në rrjetet sociale, bëri thirrje për bashkimin e "kampit institucionalist".
Abdixhiku theksoi se mbështetësit e Republikës dhe të rrugës euroatlantike kanë një shtëpi të përbashkët politike në LDK. Ai shkroi: "Koha kërkon bashkim, të institucionalistëve, mbështetësve të Republikës dhe të gjithë udhëtarëve të rrugës euroatlantike. Të gjithë këta kanë një shtëpi të përbashkët, Lidhjen Demokratike të Kosovës, prandaj, do të nis bashkimin e madh politik e qytetar rreth një projekti të përbashkët, një projekti që tejkalon secilin prej nesh, që tejkalon dallimet e vogla, ambiciet e mëdha dhe hidhërimet e së shkuarës."
Thirrja u interpretua si ftesë për rikthimin e presidentes Vjosa Osmani dhe ish-anëtarëve të tjerë të LDK-së. Kjo vjen në një periudhë me diskutime për ripozicionime në skenën politike kosovare.