Albulena Haxhiu, ushtruesja e detyrës së presidentes së Kosovës, ka dërguar letër zyrtare Robertës Metsola, presidentes së Parlamentit Evropian, dhe Kaja Kallas, përfaqësueses së lartë të Bashkimit Evropian për Punë të Jashtme dhe Politikë të Sigurisë, njëherësh zëvendëspresidente e Komisionit Evropian.
Në letër, Haxhiu i fton zyrtarët e BE-së të dërgojnë Misionin Vëzhgues të Zgjedhjeve për zgjedhjet e parakohshme për Kuvendin e Republikës së Kosovës, të caktuara për 7 qershor 2026. Ajo thekson se ka nxjerrë vendimin për datën e zgjedhjeve në përputhje me përgjegjësitë kushtetuese.
Haxhiu vlerëson se prania e këtij misioni të pavarur do të përcjellë dhe vlerësojë zhvillimin e zgjedhjeve, duke kontribuar në transparencën, kredibilitetin dhe integritetin e procesit. Kjo është në përputhje me përkushtimin e Kosovës për standarde demokratike dhe zgjedhje të lira.
Kosova ka vlerësuar vazhdueshëm rolin e Bashkimit Evropian në mbështetjen e institucioneve demokratike dhe avancimin e standardeve zgjedhore. Ftesa për misionin vëzhgues shpreh përkushtimin e institucioneve kosovare për një proces zgjedhor të hapur, transparent dhe të besueshëm.