Albulena Haxhiu, ushtruesja e detyrës së presidentes së Republikës së Kosovës, ka nënshkruar më 4 maj 2026 dekretin për themelimin e Misionit Konsullor të Republikës së Kosovës në shtetin e Teksasit, në Shtetet e Bashkuara të Amerikës, me seli në Houston.
Ky mision do të funksionojë në nivel të Konsullatës së Përgjithshme dhe synon forcimin e pranisë diplomatike të Kosovës në SHBA, si dhe ofrimin e shërbimeve konsullore për diasporën kosovare në Teksas dhe rajonin përreth. Vendimi vjen pas propozimit të Ministrisë së Punëve të Jashtme dhe Diasporës, e cila obligohet të ndërmarrë të gjitha veprimet e nevojshme për zbatimin e dekretit. Dekreti ka hyrë në fuqi në datën e nënshkrimit.
Në një njoftim në Facebook, Haxhiu e cilësoi këtë si një hap të rëndësishëm për bashkatdhetarët në Teksas dhe rajonin përreth, si dhe mirënjohje për mërgatën shqiptare në Amerikë. Ajo theksoi se mërgata ka pasur rol kyç në çdo kapitull të rrugës së Kosovës, prej rezistencës deri te shtetndërtimi, duke punuar, ndihmuar, lobuar dhe qëndruar pranë saj për dekada.
Sipas Haxhiut, me këtë mision Kosova bëhet më e afërt për qytetarët e saj dhe më e pranishme në një nga qendrat më të rëndësishme ekonomike dhe shoqërore të Amerikës.