Lutfi Haziri, nënkryetar i Lidhjes Demokratike të Kosovës (LDK), deklaroi se kryetari i partisë, Lumir Abdixhiku, ka marrë përgjegjësinë për rezultatin e dobët të zgjedhjeve të fundit nacionale duke dhënë dorëheqje.
Ai theksoi se Abdixhiku nuk konsultoi kolegët para këtij veprimi. "Asnjë minutë nuk na ka dhënë kohë Lumir Abdixhiku për të kërkuar faturim apo përgjegjësi. E ka marrë vetë. Më 28-in, në mbrëmje, ka dalë vetë dhe e ka marrë këtë përgjegjësi. E ka bërë aktin politik. [...] As nuk është konsultuar me mua, as me kolegët e tjerë që atë ditë kemi qenë në proces zgjedhor. Të njëjtën e ka bërë edhe më 9 shkurt", tha Haziri.
Haziri, ish-kryetar i Gjilanit dhe deputet i Kuvendit të Kosovës, nënvizoi se përgjegjësia ndahet sipas renditjes në listën zgjedhore ose në kryesi. "Kryesia është organ ekzekutiv, organi më i lartë. Por kjo garë është e 110 burrave dhe grave për zgjedhje politike që janë për Kuvendin e Republikës, sepse ne kemi demokraci parlamentare. Kuvendi është organi kryesor në këtë Republikë Kushtetuese dhe zgjedhjet për Kuvend janë më të rëndësishmet", shtoi ai.
Ai krahasoi dorëheqjen me shtatzëninë: "Nuk ka gjysmë shtatzënie, nuk mundet me u abortu kjo punë nëse nuk ka shtatzëni. Lumir Abdixhiku ka thënë se është dorëheqje. Akti i dorëheqjes, si i tillë, e ruan respektin tim, respektin e kolegëve, të anëtarësisë, të qytetarëve dhe të votuesve. Këtë akt e ka konfirmuar vetë, me gojën e vet".
Deklarata u bë në një intervistë për Periskopi, ku Haziri e cilësoi veprimin si akt politik që ka ndezur debate në Kosovë dhe përtej LDK-së.