Lutfi Haziri, nënkryetar i Lidhjes Demokratike të Kosovës (LDK), konfirmoi se kryetari i këtij subjekti, Lumir Abdixhiku, po mban një takim me ish-presidenten Vjosa Osmani. Takimi zhvillohet të enjten në një restorant dhe nuk është i pari midis tyre për këtë çështje.
Sipas Hazirit, Abdixhiku dhe Osmani kanë arritur pajtueshmëri për bashkim në zgjedhjet e ardhshme. Në emisionin “Konfront” të KTV-së, ai deklaroi se po diskutohet modaliteti dhe forma për ndërtimin e një force të djathtë, ndoshta në listën e LDK-së. “Pajtueshmëria për një garë ekziston tashmë, për modalitetin dhe formën do të bëhet me dije pasi të arrihet pajtueshmëri e plotë”, tha Haziri.
Haziri e cilësoi si kthim në garë të përbashkët dhe front të përbashkët. Ai refuzoi të konfirmojë nëse bëhet fjalë për kthim të Osmanit në parti, duke thënë se këto janë çështje në diskutim.
Sipas ekipit të Koha.net-it, në takim marrin pjesë edhe këshilltarja e Osmanit, Meliza Haradinaj-Stublla, si dhe ish-deputeti i Lëvizjes Vetëvendosje, Haxhi Avdyli.
Përditësime
Lumir Abdixhiku deklaroi pas takimit se "shumë shpejt do të vijmë me lajme të mira" dhe se "një pjesë substanciale e kthimit të madh të LDK-së tashmë është arritur".
Vjosa Osmani e përshkroi takimin si "kafe mes miqsh". Takimi zgjati rreth dy orë.
Kjo vjen në prag të zgjedhjeve të jashtëzakonshme parlamentare më 7 qershor.