Nënkryetari i Lidhjes Demokratike të Kosovës (LDK), Lutfi Haziri, ka deklaruar se rezultatet e zgjedhjeve kanë krijuar një detyrim politik për bashkëpunim ndërmjet subjekteve për krijimin e institucioneve të reja. Në një prononcim për emisionin "Rubikon" në Klan Kosova, ai theksoi se fryma e Kushtetutës së Kosovës mbështetet te bashkëpunimi si element kyç për stabilitetin.
Sipas Hazirit, asnjë forcë politike nuk ka legjitimitet për të qeverisur e vetme apo për të bllokuar proceset institucionale. Ai propozoi ndërtimin e një "marrëveshjeje në pako", duke nënvizuar se nëse nuk arrihet dakordimi për të gjitha çështjet, ngërçi është i pashmangshëm.
"Vota qytetare konfirmon detyrim në bashkëpunim. Fryma jonë kushtetuese e ka vendosur bashkëpunimin si çelës të ndërtimit të institucioneve", deklaroi Haziri.
Nënkryetari i LDK-së shtoi se vonesat në këtë proces janë të panevojshme dhe të dëmshme për vendin. Ai theksoi se, nëse LDK do të kishte dalë forcë e parë në këto zgjedhje, ftesat për bashkëpunim institucional do të ishin ndërmarrë menjëherë pas përfundimit të procesit zgjedhor.