Ministria e Shëndetësisë dhe Mirëqenies Sociale ka reaguar zyrtarisht pas ngjarjes së rëndë të ndodhur këtë të hënë, ku një 37-vjeçare shtatzënë humbi jetën gjatë transportimit drejt kryeqytetit për ndihmë të specializuar mjekësore. Viktima, e identifikuar si Marjana Karolina Bunaj, ishte rreth 7 muaj shtatzënë, ndërsa fatkeqësisht humbi jetën edhe foshnja e saj.
Sipas informacioneve, gruaja u paraqit fillimisht në Spitalin e Pogradecit për shkak të problemeve shëndetësore, ku pas ekzaminimeve mjekët vendosën transferimin e saj drejt Tiranës. Gjatë udhëtimit, në afërsi të Elbasanit, gjendja e saj u përkeqësua deri në ndarjen nga jeta. Familjarët kanë shprehur dyshime mbi mënyrën e menaxhimit të rastit në maternitetin e Pogradecit dhe kërkojnë zbardhjen e rrethanave.
Në reagimin e saj zyrtar, Ministria thekson se po ndjek me përgjegjshmëri të plotë hapat për zbardhjen e ngjarjes. Është kërkuar një vlerësim i pavarur dhe profesional për të gjithë procesin e kujdesit shëndetësor, nga momenti i paraqitjes së pacientes deri në fund të trajtimit.
“Angazhimi ynë është i plotë për të garantuar transparencë dhe përgjegjshmëri. Çdo gjetje mbi vlerësimin e menaxhimit të rastit do të analizohet me seriozitetin maksimal dhe, nëse evidentohen parregullsi apo mangësi në ndjekjen e rastit, do të merren të gjitha masat e nevojshme, në përputhje me ligjin dhe standardet profesionale”, deklaroi ministria. Institucioni nënvizoi se garantimi i kujdesit obstetrikal cilësor mbetet një përgjegjësi e panegociueshme e sistemit shëndetësor.
Përditësime
Familjarët e 37-vjeçares Marjana Karolina Bunaj dorëzuan sot një kallëzim penal në Prokurori për neglizhencë mjekësore. Burime zyrtare konfirmuan se pas ndërhyrjes, edhe foshnja ka humbur jetën së bashku me nënën. Ministria e Shëndetësisë shprehu ngushëllime të drejtpërdrejta për familjen, duke konfirmuar mbështetjen për hetimet e nisura.