Prokuroria polake ka hapur një hetim zyrtar për terrorizëm dhe pjesëmarrje në veprimtarinë e shërbimeve të huaja të inteligjencës, pas zjarrit që përfshiu ambientet e prodhimit të kompanisë WB Electronics më 31 gusht. Sipas të dhënave paraprake, zjarri u shkaktua nga vendosja e qëllimshme e një pajisjeje shpërthyese. Kamerat e sigurisë kanë regjistruar një person të maskuar që ka hyrë në objekt pasi ka kapërcyer gardhin rrethues, ndërsa në vendngjarje janë gjetur objekte të braktisura, përfshirë një çantë shpine dhe një bluzë.
Ministri i Brendshëm i Polonisë, Marcin Kierwinski, deklaroi për gazetarët se të gjitha provat e mbledhura deri më tani orientojnë hetimin drejt pistës së sabotimit. Megjithëse dëmet në infrastrukturë janë të konsiderueshme, zjarrfikësit arritën ta vinin situatën nën kontroll për më pak se dy orë. Remigiusz Wilk, përfaqësues i WB Group, deklaroi se ky incident nuk pritet të ndikojë në furnizimet e ushtrisë polake, ndërsa prodhimi do të rifillojë sapo ekspertët të përfundojnë këqyrjen e vendngjarjes.
Kjo ngjarje ndodh në një kohë kur autoritetet po hetojnë gjithashtu një zjarr tjetër të ndodhur në një magazinë në Lublin, ku prodhohen pjesë për avionë. Ndonëse zyrtarët nuk kanë konfirmuar ende një lidhje mes dy incidenteve, zëdhënësja e Ministrisë së Brendshme, Karolina Galecka, njoftoi se po shqyrtohet çdo pistë. Shqetësimet rriten për shkak të paralajmërimeve të vazhdueshme nga inteligjenca perëndimore për operacione të mundshme sabotimi kundër fabrikave evropiane të armatimeve që furnizojnë Ukrainën. Qeveria ruse ka mohuar vazhdimisht përfshirjen në incidente të tilla të raportuara në të gjithë Evropën.