Hetimet në lidhje me vdekjen e këngëtarit George Mazonakis kanë avancuar pas analizimit të pajisjeve elektronike të sekuestruara në klinikën e mjekëve Elias Theodoropoulos dhe Ioanna Gaka. Dy mjekët, të cilët janë nën akuzë për ekspozim që shkaktoi vdekjen në bashkëpunim, janë referuar pranë hetuesve për të dhënë shpjegime të mëtejshme.
Sipas të dhënave të zbuluara, në telefonin e njërit prej mjekëve është gjetur një fotografi e fshirë e këngëtarit, i cili shfaqet i shtrirë në shtratin e makinës së plazmaferezës. Autoritetet po punojnë për të përcaktuar datën e saktë të shkrepjes së fotos. Një tjetër gjetje e rëndësishme lidhet me historikun e kërkimeve në kompjuterin e klinikës, ku rezulton se gjatë momenteve të përkeqësimit të gjendjes shëndetësore të këngëtarit, është përdorur inteligjenca artificiale për të kërkuar mënyra se si mund të shpëtohej apo rikthehej në jetë një pacient.
Hetuesit kanë vënë re gjithashtu një fshirje selektive të shënimeve në kalendarin elektronik të klinikës, ku ishin hequr vetëm takimet e planifikuara me George Mazonakis, ndërsa të dhënat e tjera mbetën të paprekura. Kjo gjetje vlerësohet si një tentativë për të ndryshuar kronologjinë e ngjarjeve. Analiza e pamjeve nga kamerat e sigurisë ka provuar se këngëtari ka hyrë në klinikë pak pas orës 13:00, një fakt që bie ndesh me deklarimet e mëparshme të mjekëve, të cilët kishin pretenduar për një kohë tjetër.
Aktualisht, autoritetet po kryejnë një ekzaminim të detajuar të softuerit të makinës së plazmaferezës, të cilin e kanë cilësuar si një "kuti të zezë" për të kuptuar kohëzgjatjen dhe funksionimin e pajisjes gjatë kohës që këngëtari ndodhej në ambientet e klinikës. Shkaku përfundimtar i vdekjes mbetet në pritje të rezultateve të analizave toksikologjike dhe histologjike.
Përditësime
Prokuroria ka ngritur zyrtarisht akuzën e mjekimit të gabuar në bashkëpunim ndaj dy mjekëve, Elias Theodoropoulos dhe Ioanna Gaka. Hetimet zbuluan se mjekët përdorën ChatGPT për të kërkuar asistencë mjekësore emergjente ndërsa këngëtari George Mazonakis ndodhej ende në zyrën e tyre. Ky veprim dëshmon për ndërhyrje të papërshtatshme gjatë krizës shëndetësore të pacientit.
Hetuesit zbuluan një fotografi të fshirë në telefonin e mjekut të implikuar, e cila shfaq këngëtarin George Mazonakis të shtrirë në shtratin e plazmaferezës. Autoritetet po kryejnë një ekzaminim dixhital për të përcaktuar datën dhe kohën e saktë të shkrepjes së imazhit. Ky provë mund të shërbejë si një element kyç për zbardhjen e dinamikës së ngjarjes gjatë qëndrimit të këngëtarit në klinikë.
Mjekët e spitalit 'Elpis' zhvilluan një përpjekje intensive 50-minutëshe për të rikthyer në jetë këngëtarin George Mazonakis pas mbërritjes së tij në urgjencë. Hetimet e prokurorisë tashmë janë përqendruar te minutat kritike të zhvilluara përpara transportimit të këngëtarit me ambulancë, me qëllim sqarimin e plotë të kronologjisë së ngjarjeve.
Hetuesit zbuluan materiale të reja dixhitale në telefonin e mjekes Ioanna Gaka. Ekspertiza teknike nxori në dritë dy fotografi dhe një video të fshirë, të realizuara më 9 shtator midis orës 14:43 dhe 14:45. Metadata e këtyre skedarëve konfirmon vendndodhjen e mjekes në rrugën Karneadou. Njëra nga fotografitë rezulton t'i jetë dërguar një marrësi ende të paidentifikuar nga autoritetet. Të gjitha provat dixhitale janë fshirë nga pajisja në orën 19:09, vetëm pak minuta përpara se mjekja të paraqitej për dëshmi në polici.