Hetimet për ekzekutimin e Ferdinand Hotit kanë marrë një rrjedhë të re pas arrestimit të një çifti shqiptar në Itali. Ferdinand Hoti, me origjinë nga Kurbini, u gjet i pajetë me 8 shtator brenda një automjeti tip Fiat Bravo, të zhytur në lumin Tergola në provincën e Padovës. Trupi i viktimës ishte futur në një qese, me duar të lidhura, ndërsa autopsia konfirmoi se ai ishte qëlluar me armë zjarri përpara se të hidhej në ujë.
Në kuadër të një operacioni antidrogë të kryer nga karabinierët, u prangosën Eris Makaj dhe e dashura e tij, Noemi Karibba. Sipas hetimeve, Makaj dyshohet se shpërndante lëndë narkotike duke përdorur një monopatinë elektrike për të takuar klientët. Gjatë kontrollit në banesën e Noemi Karibba në Mirano, policia gjeti 800 gramë hashash, 200 gramë kokainë dhe 2 mijë euro në cash.
Hetuesit po analizojnë lidhjet e mundshme të Eris Makajt me Luigi Makajn, i cili u arrestua në korrik së bashku me Amiol Gjoka për tentativë vrasjeje ndaj një 25-vjeçari në Mirano. Dyshohet se edhe ky rast i mëparshëm kishte si motiv aktivitetet e paligjshme të trafikut të drogës. Një detaj i rëndësishëm për hetuesit është përdorimi i automjetit Fiat Bravo në të cilin u gjet trupi i Ferdinand Hotit, pasi dyshohet se e njëjta makinë ka qenë e përfshirë edhe në ngjarjen e ndodhur në Mirano me 30 qershor.
Deri në këtë fazë të hetimeve, lidhja mes të arrestuarve për drogë dhe vrasjes së Ferdinand Hotit mbetet në nivelin e një hipoteze hetimore. Autoritetet italiane vijojnë procedurat për të zbardhur rrethanat e plota të krimit dhe për të konfirmuar nëse ka përfshirje të drejtpërdrejtë të personave të ndaluar në ekzekutimin e 35-vjeçarit.
Përditësime
Gjykatësi në Padova ka urdhëruar mbajtjen në burg të Noemi Karibba, pas zhvillimeve të fundit në hetimet për vrasjen e Ferdinand Hotit. Autoritetet kanë saktësuar se trupi i viktimës është gjetur në San Giorgio delle Pertiche. Hetuesit kanë identifikuar si pjesë të rrjetit të trafikut të drogës Luigi Makajn (44 vjeç) dhe Amiol Gjokën (39 vjeç). Dyshimet e prokurorisë përqendrohen te viktima e tentativës së vrasjes në Mirano, e cila dyshohet se ka qenë pjesë e këtij grupi dhe është përpjekur të shkëputet nga aktiviteti kriminal.