Kombëtarja e Kosovës u mposht mbrëmë me rezultat minimal 0-1 nga Turqia në finalen e playoff-it për kualifikim në Kupën e Botës, ndeshje e luajtur në Prishtinë. Kjo humbje eliminoi Kosovën nga rruga drejt turneut botëror.
Në këtë ndeshje startuan nga minuta e parë futbollistët e klubit gjerman TSG Hoffenheim, Albian Hajdari dhe Fisnik Asllani. Hajdari u detyrua të largohej herët nga fusha për shkak të një lëndimi, ndërsa Asllani u paraqit mirë, por nuk arriti të shënojë.
Leon Avdullahu ishte gjithashtu pjesë e këtij rrugëtimi të Kosovës në kualifikime. Pas ndeshjes, faqja zyrtare e Hoffenheim-it në rrjetet sociale postoi mesazhin: "Mbani kokën lart, Albi, Fis dhe Leon. Edhe pse nuk funksionoi në fund, ju duhet të ndiheni krenarë për paraqitjet tuaja në kualifikueset e Kupës së Botës. Dhe shërim të shpejtë, Albi".
Ky reagim erdhi pas një ndeshjeje dramatike, ku Kosova nuk arriti të shfrytëzojë mundësinë për kualifikim historik. Hoffenheim-i do të kthehet në fushë të shtunën si nikoqir ndaj Mainz-it.