Qeveria e Holandës ka konfirmuar zyrtarisht planet për të investuar në zhvillimin e sistemeve me lazer, të cilat do të shërbejnë për neutralizimin e dronëve armik. Sipas Sekretarit të Shtetit për Mbrojtjen, Gijs Tuinman, ky vendim vjen si pasojë e përdorimit në rritje të këtyre pajisjeve në konflikte të ndryshme, përfshirë ato në Lindjen e Mesme, si dhe incidenteve të regjistruara kohët e fundit në afërsi të territorit holandez.
Sistemet lazer janë vlerësuar si një zgjidhje më efektive dhe më e përballueshme financiare krahasuar me raketat e mbrojtjes ajrore si Patriot, veçanërisht kur ushtria përballet me sulme nga një numër i madh dronësh. Projekti po realizohet përmes një kontrate të nënshkruar vitin e kaluar me një kompani australiane, në bashkëpunim të ngushtë me organizatën holandeze të kërkimit TNO.
Ministria e Mbrojtjes ka bërë të ditur se një prototip është zhvilluar dhe është testuar me rezultate të kënaqshme. Përdorimi i kësaj teknologjie pritet të zvogëlojë varësinë e vendit nga shtete të tjera për pajisjet e mbrojtjes ajrore. Edhe pse detajet financiare për këtë investim nuk janë bërë publike, Dokumenti i Bardhë i Mbrojtjes, i botuar gjatë kësaj vere, thekson se forcat e armatosura synojnë që brenda pesë viteve të ardhshme, më shumë se gjysma e aftësive operacionale të ushtrisë të ofrohen nëpërmjet sistemeve pa pilot dhe mjeteve mbrojtëse ndaj tyre.