Ministri për Evropën dhe Punët e Jashtme, Ferit Hoxha, mori pjesë në takimin e ministrave të Jashtëm të Kartës së Adriatikut, zhvilluar në Nju Jork në kuadër të punimeve të Asamblesë së Përgjithshme të OKB-së, nën kryesinë e Kroacisë. Gjatë fjalës së tij, ministri vlerësoi Kartën si një mekanizëm jetik për sigurinë rajonale dhe stabilitetin në Ballkanin Perëndimor.
Sipas ministrit Hoxha, siguria bashkëkohore tejkalon format konvencionale, duke përfshirë sfida si kërcënimet kibernetike, sigurinë energjetike dhe manipulimin e informacionit të huaj (FIMI). Përballë këtyre rreziqeve, ai theksoi domosdoshmërinë e një bashkëpunimi më të ngushtë dhe gjithëpërfshirës.
Një pikë qendrore e qëndrimit të tij ishte kërkesa për anëtarësimin e Kosovës në Kartën e Adriatikut, proces i cili sipas tij ka mbetur pezull për një kohë të gjatë. Hoxha deklaroi se avancimi i këtij aplikimi do të forconte kohezionin rajonal dhe do të rriste aftësinë kolektive për të përballuar sfidat e përbashkëta. Ai nënvizoi se stabiliteti afatgjatë kërkon që të gjitha vendet e rajonit të jenë të integruara plotësisht në mekanizmat e përgjegjësisë së përbashkët.
Karta e Adriatikut, e njohur ndryshe si A5, u themelua në maj 2003 nga Shqipëria, Maqedonia e Veriut, Kroacia dhe SHBA-ja, ndërsa më vonë iu bashkuan edhe Mali i Zi dhe Bosnje e Hercegovina. Hoxha përmbylli ndërhyrjen e tij duke bërë thirrje për një Kartë më të hapur dhe më të përshtatshme ndaj zhvillimeve të reja të sigurisë, si garanci për të ardhmen euroatlantike të rajonit.