Ministri për Evropën dhe Punët e Jashtme, Ferit Hoxha, zhvilloi një bashkëbisedim me përfaqësues të Unionit të Biznesmenëve Grekë në kuadër të Forumit Ekonomik të Delfit më 23 prill 2026. Diskutimet u përqendruan në diplomacinë ekonomike dhe potencialin e Shqipërisë për investime të huaja.
Në një postim në rrjetin social X, Hoxha theksoi se Shqipëria ofron një treg të hapur dhe një ekonomi dinamike e miqësore ndaj investitorëve të huaj, duke nënvizuar mundësitë dhe garancitë për biznesin ndërkombëtar.
Marrëdhëniet ekonomike dhe tregtare mes Shqipërisë dhe Greqisë po forcohen mbi baza bashkëpunimi të ndërsjellë. Greqia renditet si partneri i tretë tregtar i Shqipërisë dhe një treg i rëndësishëm për eksportet shqiptare, siç dëshmohet nga rritja e vazhdueshme e shkëmbimeve tregtare gjatë 2025 dhe muajve të parë të 2026-s.
Investimet greke janë në trend rritës, me mbi 800 ndërmarrje greke që operojnë në sektorë kyç të ekonomisë dhe punësimit shqiptar. Hoxha vuri në dukje se potenciali mbetet i madh, sidomos në perspektivën e Shqipërisë 2030, dhe kërkon angazhim të shtuar për kontakte e rrjetëzim.
Komuniteti shqiptar në Greqi vazhdon të jetë një urë lidhëse ekonomike mes dy vendeve dhe faktor në partneritetin strategjik afatgjatë.