Ferit Hoxha, ministër për Europën dhe Punët e Jashtme, zhvilloi një takim në Bruksel më 11 maj me Andreas Schieder-in, raportues për Shqipërinë në Parlamentin Evropian.
Takimi u fokusua në rezolutën e fundit të miratuara nga Komisioni për Punët e Jashtme (AFET) në Parlamentin Evropian. Hoxha vlerësoi punën dhe angazhimin e Schieder-it, duke e cilësuar rezolutën si mesazh të fortë dhe inkurajues në mbështetje të rrugës së Shqipërisë drejt anëtarësimit në Bashkimin Evropian.
Gjatë bisedës, palët shkëmbyen mendime mbi ecurinë e negociatave të Shqipërisë me BE-në, rëndësinë e ruajtjes së ritmit të reformave dhe objektivin për një proces të besueshëm, të bazuar në meritë dhe të orientuar drejt së ardhmes.
Hoxha nënvizoi rolin dhe mbështetjen e vazhdueshme të europarlamentarëve dhe miqve të zgjerimit për një Evropë më të fortë e të bashkuar. Ai falënderoi ngrohtësisht Schieder-in për kontributin e tij.
Në një postim në platformën X, Hoxha shkroi: «Gjatë qëndrimit tim në Bruksel, pata kënaqësinë të takohem me Andreas Schieder, raportues për Shqipërinë në Parlamentin Evropian. E falënderova ngrohtësisht për punën e tij të shkëlqyer dhe angazhimin e vazhdueshëm në lidhje me Rezolutën e fundit për Shqipërinë, të miratuar nga Komisioni për Punët e Jashtme në Parlamentin Evropian (AFET), e cila përcjell një mesazh të fortë dhe inkurajues në mbështetje të rrugës sonë drejt anëtarësimit evropian.»
Përditësime
Parlamenti Evropian miratoi raportin e plotë për Shqipërinë me 58 vota pro në seancën plenare. Deputetët e vlerësuan Shqipërinë si vend pararojë në procesin e zgjerimit dhe shprehën ambicie për përmbylljen e negociatave deri në 2027. Hoxha theksoi përforcimin e raportit të Komisionit Evropian dhe fushat ku Shqipëria duhet të vazhdojë përpjekjet.