Ministri për Evropën dhe Punët e Jashtme, Ferit Hoxha, ndodhet në Sofje të Bullgarisë, për të marrë pjesë në takimin e ministrave të Jashtëm të vendeve pjesëmarrëse në Procesin e Bashkëpunimit në Evropën Juglindore (SEECP). Kjo vizitë zhvillohet në kuadër të mbylljes së Presidencës bullgare për periudhën 2025–2026.
Gjatë qëndrimit në kryeqytetin bullgar, Hoxha zhvilloi një takim dypalësh me ministren e Jashtme të Bullgarisë, Velislava Petrova. Palët rikonfirmuan partneritetin e fortë mes dy vendeve dhe diskutuan mbi thellimin e dialogut politik dhe zgjerimin e bashkëpunimit në sektorë kyç si energjia, infrastruktura dhe ndërlidhja strategjike. Një theks i veçantë iu vu rëndësisë së Korridorit VIII, i cili vlerësohet si lidhje jetike midis Adriatikut dhe Detit të Zi, me potencial për të nxitur zhvillimin ekonomik dhe tregtinë në rajon.
Krahas takimit me ministren Petrova, ministri Hoxha u prit edhe nga kryetarja e Kuvendit Kombëtar të Bullgarisë, Mihaela Dotsova. Në këtë takim, u vlerësua roli i bashkëpunimit ndërparlamentar, përfshirë grupet e miqësisë, si një instrument thelbësor për forcimin e marrëdhënieve dypalëshe në fusha si ekonomia, energjia dhe turizmi.
Ministri Hoxha shprehu mirënjohjen për mbështetjen e vazhdueshme të Bullgarisë ndaj procesit të anëtarësimit të Shqipërisë në Bashkimin Evropian. Përfaqësuesit ranë dakord se e ardhmja evropiane e Ballkanit Perëndimor është parësore për sigurinë dhe stabilitetin e përbashkët. Gjithashtu, u nënvizua roli i minoriteteve kombëtare në vendet respektive, si ura miqësie dhe bashkëpunimi për forcimin e lidhjeve kulturore dhe njerëzore.