Një ngjarje e rëndë ka ndodhur në qytetin e Pejës, ku Arianit Çetaj, 34 vjeç, është gjetur i pajetë në banesën e familjes së tij, në rrugën “Vëllazëria Dalemani”. Viktima ishte djali i rapsodit të njohur Hasan Çetaj.
Sipas informacioneve, pak orë para ngjarjes, 34-vjeçari kishte marrë pjesë në një dasmë në qytetin e Prizrenit së bashku me babanë dhe pjesëtarë të tjerë të familjes. Familjarët ishin kthyer në shtëpi rreth orës 04:00 të mëngjesit dhe më pas ishin tërhequr për të pushuar.
Rreth orës 09:30, babai dhe vëllai i të ndjerit e gjetën atë të përkulur mbi një divan në tarracën e banesës. Edhe pse familjarët njoftuan menjëherë shërbimet e urgjencës dhe policinë, mjeku kujdestar konfirmoi se 34-vjeçari kishte ndërruar jetë.
Në vendin e ngjarjes kanë mbërritur njësitet policore, hetuesit, krimteknikët, si dhe prokurori i shtetit nga Departamenti për Krime të Rënda. Me vendim të prokurorit, rasti është regjistruar si “Hetim i vdekjes”, ndërsa trupi i pajetë është dërguar në Institutin e Mjekësisë Ligjore për të kryer obduksionin e nevojshëm. Shkaku i saktë i vdekjes pritet të përcaktohet pas përfundimit të ekzaminimeve mjeko-ligjore.