Një ngjarje e rëndë është regjistruar pasditen e sotme në qytetin e Durrësit, ku një 40-vjeçar ka humbur jetën gjatë orarit të punës. Viktima, e identifikuar si Euglent Lamçe, ndodhej në një kantier ndërtimi në lagjen nr. 4 të qytetit kur ka shfaqur probleme shëndetësore.
Sipas njoftimit zyrtar të Policisë së Durrësit, rreth orës 15:00, shtetasi me iniciale E. L. ka humbur ndjenjat teksa punonte. Personi në fjalë është transportuar menjëherë drejt spitalit për të marrë ndihmën e nevojshme mjekësore, por përpjekjet e personelit mjekësor për ta shpëtuar kanë qenë të pasuksesshme dhe ai ka ndërruar jetë.
Grupi hetimor, nën drejtimin e Prokurorisë, ka nisur punën për të përcaktuar shkakun e saktë të humbjes së jetës dhe për të zbardhur rrethanat e plota të kësaj ngjarjeje. Pritet që ekspertiza mjeko-ligjore të japë konkluzionet përfundimtare lidhur me shkaqet e këtij rasti tragjik.
Përditësime
Burime nga Spitali Rajonal i Durrësit konfirmojnë se shkaku paraprak i vdekjes së Euglent Lamçes, 40 vjeç, është arresti kardiak. Ekspertët vlerësojnë se puna në kushtet e temperaturave të larta gjatë muajit gusht ka ndikuar në përkeqësimin e gjendjes së tij shëndetësore gjatë orarit të punës.
Burime zyrtare konfirmojnë se kantieri i ndërtimit ku humbi jetën 40-vjeçari Euglent Lamçe është pjesë e projektit të investitorit Mohamed Alabbar në Durrës. Ngjarja tragjike është nën hetim nga Prokuroria dhe Policia e Durrësit, të cilat po verifikojnë nëse shkaku i vdekjes ka qenë arresti kardiak si pasojë e temperaturave të larta gjatë orarit të punës.