Parlamenti i Hungarisë ka miratuar ndryshimin e 16-të të Kushtetutës, i cili vendos një kufi maksimal prej tetë vitesh për ushtrimin e detyrës së kryeministrit. Ky rregull, i zbatuar në mënyrë retroaktive për mandatet pas vitit 1990, e përjashton përfundimisht ish-kryeministrin Viktor Orbán nga mundësia për të kandiduar sërish për këtë post, duke pasur parasysh qëndrimin e tij disavjeçar në krye të qeverisë.
Ndryshimi ligjor, i njohur jozyrtarisht si "Lex Orbán", u votua në parlament me 135 vota pro, 50 kundër dhe 6 abstenime. Pas votimit, presidenti i vendit, Tamás Sulyok, vendosi ta dekretojë ligjin pavarësisht rezervave të shprehura mbi ndikimin e mundshëm të kësaj mase në vullnetin e zgjedhësve. Presidenti zgjodhi ta nënshkruajë ndryshimin pa e dërguar çështjen në Gjykatën Kushtetuese.
Kufizimi i mandateve përbën një pjesë thelbësore të programit të kryeministrit aktual, Péter Magyar, i cili u zotua për reforma të thella politike pas fitores në zgjedhje. Rregulli i ri është i vlefshëm për të gjithë drejtuesit e ardhshëm të qeverisë, përfshirë vetë zotin Magyar.
Vendimi vjen në një periudhë tensionesh politike në Budapest. Marrëdhëniet mes kryeministrit dhe presidentit mbeten të vështira, pasi Péter Magyar ka kërkuar më herët largimin e Tamás Sulyok, duke e akuzuar për lidhje me pushtetin e mëparshëm. Nga ana e tij, presidenti ka paralajmëruar se ndryshimet e tilla mund të shkaktojnë kriza kushtetuese, ndërsa mbështetësit e reformës argumentojnë se kjo masë është e domosdoshme për të shmangur përqendrimin e tepërt të pushtetit te një person i vetëm.