Deputetja e Lidhjes Demokratike të Kosovës (LDK), Hykmete Bajrami, ka reaguar ashpër pas ndërprerjes së seancës konstituive të Kuvendit të Kosovës dhe zhvillimeve lidhur me zgjedhjen e nënkryetarëve. Ajo e ka vlerësuar këtë situatë si një moment të vështirë, që kërkon veprime të menjëhershme për mbrojtjen e rendit kushtetues të vendit.
Në një reagim publik, Bajrami bëri të ditur se një ndër prioritetet kryesore të punës në Kuvend do të jetë jetësimi i nismës së Institutit të Kosovës për Drejtësi (IKD). Kjo nismë synon kriminalizimin e shkeljes së Kushtetutës, duke vendosur sanksione penale për ata që cenojnë rendin ligjor. Bajrami theksoi se personat që shkelin Kushtetutën duhet të mbajnë përgjegjësi ligjore dhe të përballen me burgim, duke i krahasuar ata me armiqtë e shtetit.
Duke kritikuar ashpër qeverisjen aktuale, deputetja e LDK-së akuzoi pa përmendur emra se në pushtet ndodhet një figurë që, sipas saj, e ka shfrytëzuar premtimin për bashkim kombëtar për të ndërtuar një qasje shkatërruese ndaj shtetit. Ajo theksoi se sakrificat e qytetarëve për lirinë dhe ndërtimin e shtetit nuk duhet të zhvlerësohen nga vendime të tilla politike.
“Ky vend nuk është ndërtuar që një mashtrues, i cili erdhi në pushtet me premtimin e bashkimit kombëtar, ta rrënojë shtetin për të cilin njerëzit kanë dhënë jetën, kanë dhënë gjymtyrët dhe mbajnë ende plagët në trup!”, shkroi ndër të tjera Bajrami në rrjetet sociale.