Deputetja e Lidhjes Demokratike të Kosovës (LDK), Hykmete Bajrami, ka ritheksuar nevojën për përgjegjësi politike dhe organizimin e zgjedhjeve të brendshme. Përmes një postimi publik, ajo vlerësoi se partia ka nevojë për reflektim të thellë pas rezultateve të fundit zgjedhore, të cilat e lanë LDK-në sërish në vendin e tretë.
Bajrami, e cila më herët është dorëhequr nga pozita e nënkryetares së partisë, argumentoi se parimi i përgjegjësisë duhet të zbatohet pa përjashtim. Ajo vuri në dukje se qëndrimi i saj nuk ka ndryshuar që nga janari, kur kishte kërkuar dorëheqjen e kryetarit Lumir Abdixhiku.
"Zgjedhjet e brendshme janë zgjidhja, të sillemi me dinjitet, sepse pozitat nuk janë të përhershme", shkroi Bajrami. Ajo shtoi se në Kuvendin e partisë, rreth 45% e delegatëve votuan në favor të dorëheqjes së kryetarit, gjë që sipas saj ishte tregues i qartë për nevojën e ndryshimeve. Megjithatë, ajo theksoi se Abdixhiku vazhdoi udhëheqjen, madje me kompetenca të zgjeruara.
Sipas Bajramit, kërkesat e saj mbështeten edhe nga thirrjet publike të disa degëve të partisë, të cilat kërkojnë reflektim përballë gjendjes aktuale politike. Ajo përfundoi duke theksuar se hapja e një kapitulli të ri është e nevojshme për të rikthyer besimin e anëtarësisë dhe të qytetarëve te LDK-ja.